Timu za ligi kuu ya Vodacom Tanzania bara bado zimeendelea kutoa dozi kwenye michuano ya Azam Sports Federation Cup baada ya leo Azam FC kutoa kichapo cha magoli 4-0 kwa Africa Lyon FC mchezo uliopigwa kwenye uwanja wa Karume, Dar es Salaam.
Magoli ya Azam FC yamefungwa na Mudathir Yahya aliyefunga bao la kwanza dakika ya kwanza ya mchezo kisha Farid Musa akapachika bao mbili wavuni dakika ya 8 na 37 kipindi cha kwanza na kuufanya mchezo huo kwenda mapumziko huku Azam wakiwa mbele kwa bao 3-0 dhidi ya Africa Lyon.
Kipindi cha pili Azam waliendeleza kisago kwa Africa Lyon baada ya Ame Ally kuifungia timu yake bao la nne na kukamilisha ushindi wa Azam kwenye mchezo huo.
Azam inaungana na timu nyingine kusonga mbele kwa hatua ya 16 bora kwenye michuano ya FA ambayo bingwa wake ataiwakilisha Tanzania kwenye michuano ya kombe la Shirikisho barani Afrika msimu ujao.
